//china-cms.oss-accelerate.aliyuncs.com/b14787fada86b23c/太古中菜.jpg?x-oss-process=image/resize,m_mfit,h_457,w_817/format,webp

【金公館】正宗四川師傅風味 太古中菜食出不一樣的片皮鴨

Apr 26,2021

【金公館】正宗四川師傅風味太古中菜食出不一樣的片皮鴨

【來稿】好耐無約過朋友飯聚啦,難得晚市可以堂食,大家返工又係港島區就相約3個好朋友聚下舊。同事就介紹了一間由正宗四川師傅主理的太古中菜─金公館,唔單只環境舒適,而且裝修富有中國特色,一於就揀佢啦!

金公館依間太古中菜主打片皮鴨、酸菜魚,Venus 其中一個好朋友超鐘情於中國文化,連口味都非常中化,另一個就好鐘意食魚,最後嗰個就話想食辣,完全符合哂3位朋友所有要求。

金公館中菜位於太古康怡廣場3樓,一出地鐵站搭電梯就到,非常方便就腳。

金公館中菜

一到門口已經見到好搶眼戲曲造型裝飾長鏡十分架勢!

老壇子酸菜魚

大家都好肚餓的關係,所以我哋叫咗好多餸,好似Venus其中一個朋友仔剛坐低就即刻叫咗老壇子酸菜魚。

老壇子酸菜魚

Venus 本身怕腥、唔鐘意食魚,但見到隔離枱食到好滋味咁都想試試。令人驚喜係太古金公館中菜嘅酸菜魚唔腥之餘魚肉仲好滑,朋友仔都估唔到平時無點食魚嘅我會食完又食。

老壇子酸菜魚

真係要大讚太古金公館中菜的酸菜,用咗無筋酸菜超爽脆,聽介紹先知原來醃制方法都好講究!係用四川成都傳統老壇古法醃制酸菜,酸菜用上原汁母水、秘制香料,將新鮮菜喺恒溫恒濕環境下醃20-30日。食落超入味,完全都唔輸蝕俾魚肉㗎!

老壇子酸菜魚

差啲唔記得仲有我最愛嘅薯粉做底,加埋酸菜湯底一齊食,酸酸辣辣超開胃!

老壇子酸菜魚

薯粉好Q彈,吸收咗酸爽湯汁超好味!

麻辣水煮滑牛肉

再嚟又係大大碗上枱的麻辣水煮滑牛肉,本來以為湯底紅噹噹會辣到頂唔順,但食落又發覺其實唔係太辣,而且多咗香、麻味道,令上愈食愈上癮。牛肉火侯煮得剛好,肉質食落嫩滑唔會太老,而且份量非常之多,抵食!

麻辣水煮滑牛肉

麻辣水煮滑牛肉同樣地有薯粉做底,我一個人差唔多食哂2邊嘅薯粉。

麻辣水煮滑牛肉

麻辣水煮滑牛肉絕對係「辣」朋友嚟金公館太古中菜必點。

食咗兩道大菜後需要「休息」一下,叫咗蒜泥白玉同老火炖湯。

嚟金公館太古中菜嘅蒜泥白玉比平日食嘅大塊好多,雖然係常見菜式,但中間夾青瓜食法都係第一次。不過唔好睇小青瓜夾肉片嘅配搭,一方面將口感提升一級,加倍爽口,另一方面又中和返蒜泥白玉本身嘅油膩感,更突出蒜香味道。

蒜泥白玉

超多蒜,好香口。如果你係蒜泥白玉愛好者,嚟金公館太古中菜一定要試!

Venus 好鐘意飲湯,不過講到豬肺湯就好少飲啦,因為工序麻煩到媽媽唔會想煲,即使食中菜餐廳都少見有,不過金公館太古中菜就有青城山杏汁炖豬肺湯啦。唔好以為炖湯就一定好厚重負擔,好似呢碗杏汁炖豬肺湯反而好清新,飲唔到一絲膻味證明豬肺處理得好乾淨,加上杏汁味好濃、好香,完全將前面食嘅濃味麻辣帶走。

杏汁炖豬肺湯

實在太好飲啦,飲完成碗都唔夠喉!

話晒金公館太古中菜除咗酸菜魚外,片皮鴨都好出名,無理由唔叫。所以壓軸登場嘅就係大家最期待烤北京填鴨!金公館嘅片皮鴨唔同其地方,無咁油膩,因為佢哋特登切走鴨皮中間多餘油脂,令到成塊鴨片下無太多脂肪,對於注重健康嘅香港人好友善。

片皮鴨

食片皮鴨精粹在於皮,皮要烤得恰到好處其實好難,過火會太乾、未夠火候又唔夠脆,不過金公館太古中菜就做得唔錯,片皮鴨以傳統烤鴨方法配上獨特醬料烤製出香脆惹味口感,令人無辦法唔鍾意食。

片皮鴨

片皮鴨

單食一樣好正,加上配菜同醬料包食又係另一種滋味。

即蒸摩摩皮薄軟糯,夾入香脆鴨皮、嫩滑鴨肉已經流哂口水!金公館太古中菜喺配菜及醬料選擇上提供8種款式口味:烤鴨醬、冰梅醬、胡麻醬、桂花蜜醬、京蔥、西芹絲、青瓜條、蜜瓜條,令片皮鴨風味變化更上一層樓。

蒸摩摩皮

隨自己口味配搭,Venus 當然要一次試齊所有配菜同醬料啦!同大家用文字講解下我嘅味蕾感受:

蒸摩摩皮

一入口有熱辣辣軟糯摩摩皮、之後帶頭當然有香脆得嚟又唔會太油膩香脆鴨皮,之後有嫩滑鴨肉夾集解膩青瓜、爽口西芹絲、清新京蔥、香甜蜜瓜、帶點微辣香口芝麻醬、甜絲絲桂花蜜醬、酸甜冰梅醬、惹味烤鴨醬……

蒸摩摩皮

就係咁口中充斥多層次味道幸福感覺,差啲一個人成哂全碟片皮鴨,實在太好味!食完絕對翻尋味!

蒸摩摩皮

享受咁豐富好味嘅盛宴,以為已經可以滿足,不過朋友居然覺得唔夠完美,話一場嚟到金公館太古中菜叫多2碗擔擔麵試下,咁2人share一碗麵啦。

擔擔麵

都真係幾大碗,細食或者好似我哋前面食咗咁多,真係可以2人share一碗。

湯底有少許麻辣味,麵線爽口彈牙,間唔中食到青蔥同芝麻令到成碗味道唔再單調。

擔擔麵

金公館:太古康山道1-2號康怡廣場3樓T4號舖

作者:Venus Pang

Blog:https://blog.ulifestyle.com.hk/venuspang

*本文章所發表的全部內容均屬個人意見及感受,並不代表任何品牌(公司)與本網站言論或立場。